Go pensado, inutile che meto sul sito canzoni bele se poi nisun no sa la stuoria (cusì se disi in rovignese) che ghe sta drio. Oltre a cantarla, qua ve conto la canzon Porton Biondi. La canzon Porton Biondi xe nata in magio del 2013, proprio su la omonima spiaia. Ghe se riva anche a pie, e basta andar da Valdibora, pasando la fabrica de la Mirna, la vecia ferovia, el club de canotagio e ecote a Porton Biondi. Me ricordo che mi, Ico a Dario se ierimo un poco anoiadi de andar per i bar bevi tè e in Circolo giogar biliardo, cusì che gavevimo ciolto la chitara, una picia tastiera a bateria e un tamburo e semo andadi a Porton Biondi (sora, un fotograma del video che gavemo registrado quel giorno - e che non me sento de publicar per paura che vegni censurado). Oltre che ne piaseva star là, no iera gente in giro percé la stagion no la iera ancora incominciada, giusto quel che ne coreva. Dopo un po' de acordi a cavolo eco che pian pian la canzon la ciol forma, forsi con dentro qualche bruta parola che poi go cambiado prima de registrar, ma la cantava proprio de quel posto, de i dintorni e de cosa fasevimo per davero. In quei ani andavimo quasi ogni giorno de estate a Porton Biondi dopo del pranzo. Mi e Ico partivimo de la Carera fin la casa de Dario là de la rotonda de Valdibora, e poi vanti in bici. Rivadi a Porton Biondi, no ierimo proprio gente che stava ciapar el sol come un pol pensar, sdraiadi su la spiaia. Piutosto el sol lo ciapavimo perché no ghe iera ombra e se s'ciopava de caldo. La nostra mania del momento iera tufarse e sprizar più che podevimo, ogni minuto, posibilmente sora la gente che se gaveva sdraiado tropo vicin a la zona de pericolo. No iera el tuffo a bomba, quel xe tropo facile e spriza poco, noi studiavimo altri tipi de tuffo che spriza sai de più - ma de questo scriverò in una altra stuoria... Ghe xe due posti de dove saltar là, un vicin el altro, tuti due alti 1 metro e 80. Quando se rompevimo le bale o ierimo tropo stanchi per rampigarse su quel più libero de gente, se spostavimo sul altro che iera più comodo perché el ga per vegnir fora de l'acqua certe scale in piera che davero le scivola. Se no se stava tenti e se vigniva fora con tropa premura, ogni tanto qualchedun sbrisava - niente de grave. In ogni caso, per i casi gravi - che no go mai visto - vicin ghe xe el Ospizio Marino, che, per chi no me credi, qua soto xe la foto che dimostra che el sta de l'altra parte de Porton Biondi. Rivando al terzo verso de la canzon, oltre quela volta che la gavemo inventada, no ricordo de gaver più portado i strumenti e cantado a Porton Biondi. Quel che xe vero però xe che ogni volta che la scolto e la canto me sento dinovo un poco soto el sol a Porton Biondi, tra i cui scoi, dove pian sbati le onde, se scondi quela che per mi xe la voce de la città. Quel ano, la manìa per i tuffi e per Porton Biondi iera cusì forte che per davero semo andadi far el primo tuffo verso la fine de aprile (perché altrimenti no sarimo stadi bastanza fighi). Ala fine son stado in acqua gnanche un minuto, ma ogni tanto ghe conto la gente come che xe. Al inizio ti pensi che in aqua ti te ingelerà, za che fora, nonostante el sol, xe ancora bastanza fredo. Cavada la roba e restado in costume ti smeti per un atimo de pensar, ti ciapi la breva e ti stachi el pie del molo - oviamente in aria ti te meti in posizion per far un tuffo che spriza altrimenti no ti son un 'vero omo'. Poi ti rivi in acqua, ti sa de gaver sprizado perche l'acqua sora de ti ga fato el clasico "bum", e per qualche secondo el corpo xe cusi soto shock che più no ti senti el fredo. Questo fin che no ti inizi a capir che la pele inizia a punzerte perché ti te sta ingelando le bale, e xe riva el momento de nudar fin al scoio, rampigarte su la spiaia e sugarte col sol. Deso xe dinovo caldo. Tiziano ___________ Extra: la foto del video su iutub xe un fotograma de uno dei tanti video de tuffi (estremamente stupidi, ma econe uno qua) che gavemo girado a Porton Biondi. La tipa che se vedi no la conosevimo, ma me ricordo che iera quel giorno la più bruta de la spiaia, per questo la xe sfocada. Oltre a vederse un poco l'ospizio de l'altra parte, se vedi subito soto de ela dove le scale che scivola le vien fora del mar. Extra 2: Qua soto, la prima volta che la gavemo sonada dal vivo, el 19 agosto del 2013 in Comunità dei Italiani de Rovigno (in Circolo):
0 Commenti
|
AutoreTiziano ArchiviCategorie |